Kenning á afslætti

Maðurinn minn er búinn að vera heima síðustu kvöld sem er jafn sjaldgæft og logn á stórhöfða. Það er frekar erfitt að láta eftir fjarstýringuna svona mörg kvöld í röð og er ég iðandi í skinninu þegar hann er ekki nógu snöggur að tékka á þættinum sem við erum að horfa á þar sem hann vill flakka um allt í auglýsingahléinu (mjög ábyrgðarlaust). Ég er komin með sér heilahólf fyrir sjónvarpsþætti svo maður geti opnað og lokað eftir fjarstýringunni og svo verður maður að skálda inná milli þegar maður missir einhverja búta. Maður er svo sem farin að reikna út þessa sakamálaþætti og getur nokkuð auðveldlega hannað nýja búta og endingar. Þetta er rosalegt púl og heilaleikfimi, boðsendingar heilans eru eins og hraðaupphlaup íslenska handboltalandsliðsins, svo hratt sendast upplýsingar á milli. Einhversstaðar las ég að heilinn mundi hvílast meira þegar maður er eins og fuglaflensa fyrir framan sjónvarpið en þegar maður í raun sefur. Því þegar maður glápir er sjónvarpið í raun að leiða heilasellurnar um gangana og þær þurfa ekkert að hafa fyrir þessu, en þegar maður sefur er heilmikil starfsemi vegna drauma osfrv (sel þetta nú ekki dýrara en ég keypti það).
Er einhver sem er tilbúin að styðja þessa útsölukenningu?