Þar sem hún Berglind okkar er svo hógvær og lítillát þrátt fyrir keppnisskapið og skapandi skrif sín er hún ólíkleg til að varpa fram eigin afmælisbloggi. Ég hef aðeins fengið að hjálpa henni með þessa einstöku heimasíðu (sem hefur oft reddað hjá manni deginum) og veit því aðgangsorðið (he he). Ætla mér að nýta mér það og setja inn smá afmælisblogg svo að þið getið sett in kveðjur hér.

Það er ekki oft á ævinni sem maður kynnist fólki sem hefur þau áhrif á mann að í návist þess getur maður verið fullkomlega maður sjálfur, hvort sem maður er í besta skapi í heimi eða finnst maður vera með hruninn heim á herðunum. Botnlaust traust og enn meiri trúnaður eru meðal stærstu eiginleika hennar auk þess sem hún hefur tært og gott hjarta. Ráðin hennar eru eins og veidd upp úr viskubrunni þess sem horfir á málin frá öllum hliðum. Enda lýsa þau henni vel. Hún er þrautseiga og raunsæja unnustan, ástríka, gefandi og montnasta móðirin, einlægasti vinurinn og hornsteinn fjölskyldu sinnar. Hún er frábær húmoristi, hæfileikarík keppnismanneskja og ein af þeim sem vill og mun sífellt gera heiminn betri en hann er. Elsku Berglind, til hamingju með þrítugsafmælið!